सिरहा, आसोज १५ गते । सिराहाको नवराजपुर गाउँपालिका वडा नं. १ भगवतीपुरबाट सोमबार प्रहरीले प्रतिबन्धित लागुऔषधी सहित लक्ष्मीपुरपतारी गाउँपालिका– ६ सीतापुरका करिब ४० वर्षीय भगत यादवलाई पक्राउ गरेको छ । 

जिल्ला प्रहरी कार्यालय सिराहाका अनुसार पक्राउ परेका यादवले बोकेको बोरामा एक सय एमएलको ८४ बोतल कोडिन फस्फेट विक्सिडन सिरप, एक सय एक एम्पुल फेनार्गन, ९५ एम्पुल डाइजिपाम र ९८ एम्पुल बुप्रेनर्फिन बरामद भएको जनाएको छ ।

प्लास्टिकको बोरा बोकेर भगवतीपुर हुँदै सीतापुरतर्फ आउँदै गरेका यादवलाई शंकाको आधारमा रोकेर बोराको जाँच गर्दा उक्त परिमाणको लागुऔषध बरामद भएको प्रहरीले जानकारी दिएको छ । 

पक्राउ परेका यादवलाई इलाका प्रहरी कार्यालय लहानको हिरासतमा राखेर थप अनुसन्धान भइरहेको प्रहरीले जनाएको छ ।